Памятны камень Ядвігіну Ш.

На галоўнай вуліцы Радашковічаў, самабытнага беларускага мястэчка пад Мiнскам, усталяваны памятны камень у гонар вядомага беларускага пісьменніка і журналіста Ядвігіна Ш.

Антон Лявіцкі, адзін з заснавальнікаў беларускай мастацкай прозы, больш вядомы пад псеўданімам Ядвігін Ш., працаваў правізарам ў мясцовай аптэцы з 1891 па 1897 год. Тут жа пісьменнік ажаніўся на Люцыі Гнатоўскай, а пасля з сям”ёй пераехаў у бацькаву сядзібу Карпілаўка пад Радашковічамі. Менавіта гэтае месца і асацыiруецца ў шматлікіх з імем Ядвігіна Ш.. Тут шляхціц ствараў свае творы на беларускай мове, адгэтуль адпраўляўся ў доўгія вандраванні па родным краі. Сюды ж да яго прыходзіў юны сусед, сын арандатара Дамініка Луцэвіча па імені Іван, які пасля узяў сабе псеўданім Янка Купала.

У Радашковічах заквітнеў талент будучага знакамітага пісьменніка, фельетаніста, публіцыста. Тут у 1892 годзе Ядвігін Ш. напісаў п”есу «ЗлОдзей», якую на аматарскай сцэне спрабаваў паставіць аб”яднаны гурток беларусаў-інтэлігентаў мястэчка і ваколіц. На выручаныя за спектакль сродкі арганізатары збіраліся адкрыць бальніцу. Але ўжо гатовая пастаноўка была забаронена мясцовымі ўладамі. Гледачы так і не ўбачылі пастаноўку «ЗлОдзея» на беларускай мове. Яна ўвайшла ў гісторыю беларускага тэатра як Радашковіцкая тэатральная задума. Пазней рукапіс п”есы быў страчаны.

Ядвігін Ш. з”яўляецца аўтарам зборнікаў апавяданняў «Бярозка», «Васількі», «Апавяданні», а таксама нарысу «Дзед Завала», кнігі «Успаміны» і няскончанага рамана «Золата».

раскрыць увесь тэкст