Экскурсія Сафары на Прыпяцкім Полессі

Беларускае Палессе – вабны край, што кліча да сябе. Этнаграфічны рэгіён, што ўлюбляе ў сябе кожнага, хто пабываў тут хоць раз. Тут гісторыя, што захавалася паўсюдна, зачараванне «закінутых» у часе вёсак. Вы акунецеся ў царства прыроды – узбярэжжа Прыпяці адкрые пагляду бязмежны абшар лясоў, балот і воднай роўнядзі. З усім, што Вы не ўбачыце сваімі вачыма, пазнаёмяць уважлівыя экскурсаводы музея прыроды і побыту ў мястэчку Ляскавічы. Вялікая экспазіцыя адкрые таямніцы багатага жывёльнага і расліннага свету. А таямніцы спрадвечна Палескага побыту адкрыюцца ў тэматычнай зале этнаграфіі Палескага краю, у «доме Палешука» і ў зале археалогіі.

«Сафары-парк» - гэта дзіўнае месца, якое размясцілася на тэрыторыі Нацыянальнага парку «Прыпяцкі». Сафары - рай для жывёл і турыстаў. На вялізнай тэрыторыі, амаль некранутай чалавекам, пражываюць самыя розныя насельнікі Палескіх унікальных мясцін. У парку створаны ўмовы максімальна набліжаныя да натуральнага асяроддзя пражывання. А некаторых жывёл, калі пашанцуе, можна нават пагладзіць з акна сафары-цягніка.