Гісторыка-культурны музей-запаведнік «Нясвіж»

Нацыянальны гісторыка-культурны музей-запаведнік "Нясвіж" быў створаны ў 1993 годзе. Музейны фонд пачаў фарміравацца ў 1996 г. У 2001 годзе на баланс музея-запаведніка быў перададзены Палацавы ансамбль. У 2012 годзе былі завершаны рэстаўрацыйныя працы Палацавага ансамбля і 20 ліпеня 2012 г. было яго ўрачыстае адкрыццё. З 2010 года музеем-запаведнікам кіруе кандыдат гістарычных навук С.М. Клімаў. На балансе музея знаходзяцца наступныя аб'екты: "Палацава-паркавы ансамбль XVI - XIX стст.", Комплекс кляштара езуітаў XVI - XVII стст., Кастёл Божага Цела, Ансамбль ратушы з гандлёвымі радамі XVI ст., Слуцкая брама другой паловы XVI ст., заезджы двор XIX ст.. Музей-запаведнік размешчаны ў 15-ці музейных будынках агульнай дэманстратыўнай плошчай залаў 3250,4 м2. 44 пастаянных і 2 часовых перасоўных экспазіцыі налічваюць 24414 музейных прадметаў, з якіх 5802 асноўнага фонду і 18612 - навукова-дапаможнага. У складзе музея-запаведніка вылучаюцца розныя аддзелы і сектара. Навукова-фондавы аддзел ўключае ў сябе калекцыі зброі, археалогіі, нумізматыкі, выяўленчага мастацтва, мэблі і г.д.. Аддзел займаецца вывучэннем музейных прадметаў і забяспечвае іх захаванасць ад пашкоджанняў і крадзяжоў. Экспазіцыйна-выставачны аддзел займаецца стварэннем і абнаўленнем экспазіцый музея-запаведніка, а таксама арганізацыяй выставачнай дзейнасці. Навукова-асветніцкі аддзел каардынуе навуковую дзейнасць музея-запаведніка, праводзіць метадычную працу, курыруе пытанні выдавецкай дзейнасці. Аддзел экскурсій, маркетынгу і сувязі з грамадзкасьцю стварае сучасны імідж музея-запаведніка, пашырае яго аўдыторыі. Рэстаўрацыйны аддзел займаецца аднаўленнем каштоўных прадметаў для далейшага захавання і экспанавання. Сектар па навукова-экскурсійнай рабоце "Палацавага ансамбля" праводзіць аглядныя экскурсіі па палацы, вывучае гісторыю Радзівілаў. Сектар па навукова-экскурсійнай працы "Ратуша" праводзіць аглядныя экскурсіі па ратушы, а таксама вывучае гісторыю Нясвіжа.

У музеі-запаведніку праводзяцца культурна-масавыя мерапрыемствы, сярод якіх музейныя заняткі і лекцыі для студэнтаў і школьнікаў на аснове экспазіцый і зменных выстаў музея. Адзін раз у год праходзіць мерапрыемства "Ноч музеяў" з тэатральнымі пастаноўкамі і канцэртамі, якія звязаны тэматычна з экспазіцыяй музея. Адзін раз у год праводзяцца оперныя і балетныя пастаноўкі, гала-канцэрт "Вечары опернага тэатра ў замку Радзівілаў". Адзін раз у квартал праводзяцца экскурсіі-анімацыі - экскурсіі з элементамі тэатралізацыі для прыцягнення разнастайных груп наведвальнікаў і музычныя мерапрыемствы ў тэатральнай зале. У музеі налічваецца больш за 50 гуртоў сувенірнай прадукцыі, каля 100 найменняў тавараў, у тым ліку кнігі, магніты, паштоўкі, сумкі, штодзённікі, ручкі, вырабы з дрэва, металу і керамікі, фірмовы шакалад. Навукова-даследчая праца, якая праводзіцца ў музеі, накіравана на арганізацыю канферэнцый і семінараў, вывучэнне гісторыі роду Радзівілаў і горада Нясвіжа, напісання навуковых артыкулаў, вывучэнне калекцый.