Полацкі музей-бібліятэка Сімяона Полацкага

Музей-бібліятэка Сімяона Полацкага размешчаны ў будынку былой Брацкай школы, сярод залаў Музея беларускага кнігадрукавання і ўваходзіць у склад Нацыянальнага Полацкага гісторыка-культурнага музея-запаведніка (НПГКМЗ). Ён аформлены ў стылі заходнееўрапейскай бібліятэкі XVII-ХVІІІ стст. - Двухузроўневае размяшчэнне кніжных шафоў, бюсты навукоўцаў і філосафаў, чытальная зала і пасярэдзіне - глобус (самы вялікі ў Беларусі). Мастацка ўвасобіў гэтую ідэю полацкі мастак І. Куржалаў.Экспазіцыя распавядае пра розныя перыяды жыцця і дзейнасці Сімяона Полацкага: самы ранні полацкі перыяд, гады вучобы ў Кіеве і Вільні, маскоўскі перыяд жыцця. Значнае месца ў музейнай экспазіцыі адводзіцца літаратурнай і выдавецкай дзейнасці Сімяона Полацкага. Музей быў адкрыты 25 Сакавіка 1994 г. Экспазіцыйная плошча - 134,5 м2. Экспануецца 145 музейных прадметаў. Акрамя таго, тут захоўваецца частка калекцыі друкаваных выданняў з фондаў Нацыянальнага Полацкага гісторыка-культурнага музея-запаведніка і фонд навуковай бібліятэкі. Працуе чытальная зала на 10 месцаў. У памяшканні музея-бібліятэкі праходзяць розныя прэзентацыі, сустрэчы з вядомымі паэтамі і пісьменнікамі, навуковыя канферэнцыі.

Заўвагі: у летні час (з 1 чэрвеня па 31 жніўня) музей працуе з 10.00 да 18.00 кожны дзень, акрамя панядзелка. Чытальная зала працуе ў сераду, чацвер і суботу з 10.00 да 16.00.