Указ Прэзідэнта Рэспублікі Беларусь ад 28 ліпеня 1999 г. №447

Указ "Аб стварэнні Нацыянальнага парка "Нарачанскі"

У мэтах захавання ўнікальных прыродных комплексаў, больш поўнага і эфектыўнага выкарыстання рэкрэацыйных магчымасцей прыродных рэсурсаў Мядзельскага раёна і прылеглых да яго тэрыторый і ў адпаведнасці са Схемай рацыянальнага размяшчэння асабліва ахоўных прыродных тэрыторый Рэспублікі Беларусь пастанаўляю:

1. Стварыць з улікам прапаноў Міністэрства прыродных рэсурсаў і аховы навакольнага асяроддзя, Нацыянальнай акадэміі навук Беларусі, Мінскага аблвыканкама, Упраўлення справамі Прэзідэнта Рэспублікі Беларусь на тэрыторыі Мядзельскага, Вілейскага, Пастаўскага, Смаргонскага раёнаў Нацыянальны парк "Нарачанскі" плошчай 94 тыс. гектараў і яго навукова-вытворчую базу - эксперыментальную лесаахоўную гаспадарку "Мядзель" плошчай 32,2 тыс. гектараў з перадачай іх у вядзенне Упраўлення справамі Прэзідэнта Рэспублікі Беларусь. У гэтых мэтах:

   • перадаць ва ўстаноўленым парадку Мядзельскі лясгас (па стане на 1 ліпеня 1999 г.) з вядзення Міністэрства лясной гаспадаркі ў вядзенне Упраўлення справамі Прэзідэнта Рэспублікі Беларусь;

   • вылучыць зямельныя ўчасткі (землі ляснога фонду) агульнай плошчай 317 гектараў, у тым ліку 135 гектараў з земляў Пастаўскага лясгаса (квартал N 98 Лынтупскага лясніцтва) і 182 гектары з земляў Смаргонскага лясгаса (кварталы N 49 і 50 Вішнеўскага лясніцтва), і прадаставіць іх у пастаяннае карыстанне Нацыянальнаму парку "Нарачанскі".

   Устанавіць, што да вылучэння і прадастаўлення зямельных участкаў Нацыянальнаму парку "Нарачанскі" землекарыстальнікі абавязаны выконваць на гэтых землях рэжым гаспадарчай дзейнасці і правілы аховы прыродных рэсурсаў у адпаведнасці з заканадаўствам Рэспублікі Беларусь.

2. Зацвердзіць прыкладзеныя Палажэнне аб Нацыянальным парку "Нарачанскі", апісанні межаў Нацыянальнага парку "Нарачанскі" і яго ахоўнай зоны.

3. Савету Міністраў Рэспублікі Беларусь:

   • у месячны тэрмін унесці ва ўстаноўленым парадку прапановы аб вызваленні ад выплаты курортнага збору асоб, якія прыбываюць на адпачынак у здраўніцы, на турыстычныя базы і ў зоны адпачынку, размешчаныя на тэрыторыі Нацыянальнага парку "Нарачанскі", і аб усталяванні кампенсацыйных выплат, якія спаганяюцца з указаных асоб (у тым ліку за карыстанне прыроднымі экасістэмамі і рэкрэацыйную нагрузку), з унясеннем атрыманых сум на адпаведны рахунак гэтага парку для правядзення прыродаахоўных мерапрыемстваў;

   • забяспечыць прывядзенне прававых актаў Урада Рэспублікі Беларусь і падначаленых яму рэспубліканскіх органаў дзяржаўнага кіравання ў адпаведнасць з гэтым Указам.

4. Упраўленню справамі Прэзідэнта Рэспублікі Беларусь ва ўстаноўленым парадку забяспечыць у двухмесячны тэрмін:

   • зацвярджэнне структуры, штата і каштарысу выдаткаў на ўтрыманне Нацыянальнага парку "Нарачанскі" і яго рэгістрацыю;

   • сумесна з Міністэрствам лясной гаспадаркі, Міністэрствам сельскай гаспадаркі і харчавання, Міністэрствам фінансаў, Мінскім і Віцебскім аблвыканкамамі, Мінскім гарвыканкамам - выкананне арганізацыйна-тэхнічных мерапрыемстваў, пералічаных у пунктах 1, 6 і 7 гэтага Указа;

   • сумесна з зацікаўленымі - распрацоўку і зацвярджэнне плана падрыхтоўкі праектаў, звязаных з арганізацыяй і развіццём Нацыянальнага парку "Нарачанскі";

   • у межах сваёй кампетэнцыі прыняцце іншых мер, неабходных для рэалізацыі палажэнняў гэтага Указа.

5. Міністэрству фінансаў пры фарміраванні бюджэту на 2000 і наступныя гады прадугледжваць выдзяленне Нацыянальнаму парку "Нарачанскі" фінансавых сродкаў на ўтрыманне гэтага парку, вядзенне лясной і паляўнічай гаспадаркі, а таксама на распрацоўку праектаў, прадугледжаных у чацвёртым абзацы пункта 4 гэтага Указа.

6. Міністэрству сельскай гаспадаркі і харчавання, Мінскім аблвыканкаму і гарвыканкаму, Міністэрству спорту і турызму, Дзяржаўнаму камітэту па гідраметэаралогіі, Нацыянальнай акадэміі навук Беларусі, Беларускаму дзяржаўнаму ўніверсітэту забяспечыць перадачу ва ўстаноўленым парадку ў вядзенне Нацыянальнага парку "Нарачанскі" аб'ектаў гаспадарчага і турыстычнага прызначэння згодна з дадаткам 1.

   Пункт 6 - з зменамі, унесенымі Указам Прэзідэнта Рэспублікі Беларусь ад 25 жніўня 1999 года N 494. Міністэрству сельскай гаспадаркі і харчавання, Мінскім аблвыканкаму і гарвыканкаму забяспечыць перадачу ва ўстаноўленым парадку ў вядзенне Нацыянальнага парку "Нарачанскі" аб'ектаў гаспадарчага і турыстычнага прызначэння згодна з дадаткам 1.

7. Мінскаму і Віцебскаму аблвыканкамам перадаць у пастаяннае карыстанне Нацыянальнаму парку "Нарачанскі" вадаёмы згодна з дадаткам 2.

8. Мінскаму аблвыканкаму забяспечваць усталяванне заданняў па аб'ёмах паставак тавараў (работ, паслуг) для рэспубліканскіх дзяржаўных патрэб і лімітаў цэнтралізавана размеркаваных рэсурсаў для Мядзельскага раёна з улікам стварэння Нацыянальнага парку "Нарачанскі".

9. Беларускаму рэспубліканскаму саюзу спажывецкіх таварыстваў і Беларускаму рэспубліканскаму аб'яднанню "Белмежкалгасздраўніца", Мінскаму абласному савету АСВОД у месячны тэрмін вырашыць пытанне перадачы ў вядзенне Нацыянальнага парку "Нарачанскі" аб'ектаў гаспадарчага прызначэння і адпачынку згодна з дадаткам 3.

   Пункт 9 - з зменамі, унесенымі Указам Прэзідэнта Рэспублікі Беларусь ад 25 жніўня 1999 года N 494. Беларускаму рэспубліканскаму саюзу спажывецкіх таварыстваў і Беларускаму рэспубліканскаму аб'яднанню "Белмежкалгасздраўніца" у месячны тэрмін вырашыць пытанне перадачы ў вядзенне Нацыянальнага парку "Нарачанскі" аб'ектаў гаспадарчага прызначэння і адпачынку згодна з дадаткам 3.

Прэзідэнт Рэспублікі Беларусь А.ЛУКАШЭНКА

1. Нацыянальны парк "Нарачанскі" (далей - Нацыянальны парк) створаны з мэтай захавання ўнікальных прыродных комплексаў, больш поўнага і эфектыўнага выкарыстання рэкрэацыйных магчымасцяў прыродных рэсурсаў Мядзельскага раёна і сумежных з ім тэрыторый.

2. Нацыянальны парк з'яўляецца комплекснай прыродаахоўна-гаспадарчай і навукова-даследчай установай і знаходзіцца ў вядзенні Упраўлення справамі Прэзідэнта Рэспублікі Беларусь.

3. Асноўнымі задачамі Нацыянальнага парку з'яўляюцца:

   • захаванне прыроднага комплексу Нарачанскай групы азёр як гістарычна сфарміраванага ландшафту і генетычнага фонду расліннасці і жывёльнага свету, тыповага для Нарачанскага рэгіёну;

   • арганізацыя экалагічнай асветы і выхавання насельніцтва;

   • правядзенне навуковых даследаванняў, звязаных з распрацоўкай і ўкараненнем у практыку навуковых метадаў захавання біялагічнай разнастайнасці, вывучэннем прыродных аб'ектаў і комплексаў;

   • распрацоўка і ўкараненне ў практыку навуковых метадаў аховы прыроды і прыродакарыстання;

   • захаванне культурнай спадчыны (аб'екты этнаграфіі, археалогіі, гісторыі, палеанталогіі і інш.);

   • арганізацыя рэкрэацыйнай дзейнасці;

   • вядзенне комплекснай гаспадаркі на аснове традыцыйных метадаў і перадавых дасягненняў прыродакарыстання.

4. Нацыянальны парк у сваёй дзейнасці кіруецца заканадаўствам Рэспублікі Беларусь, дадзеным Палажэннем і ажыццяўляе яе ў адпаведнасці з распрацаванымі праектамі арганізацыі і развіцця парку, праграмамі і планамі яго работы.

   Праекты арганізацыі і развіцця Нацыянальнага парку зацвярджаюцца Упраўленнем справамі Прэзідэнта Рэспублікі Беларусь па ўзгадненні з Міністэрствам лясной гаспадаркі, Міністэрствам прыродных рэсурсаў і аховы навакольнага асяроддзя. Праграмы, перспектыўныя і гадавыя планы работы парку ўзгадняюцца і зацвярджаюцца Упраўленнем справамі Прэзідэнта Рэспублікі Беларусь.

   Для забеспячэння выканання згаданых праектаў, праграм і планаў Нацыянальным паркам ажыццяўляецца неабходная навукова-арганізацыйная і адміністрацыйна-гаспадарчая дзейнасць, якая не супярэчыць заканадаўству Рэспублікі Беларусь і асноўным задачам Нацыянальнага парку.

5. Нацыянальны парк з'яўляецца юрыдычнай асобай, мае самастойны баланс, пячатку з выявай Дзяржаўнага герба Рэспублікі Беларусь і сваё найменне, сімволіку (эмблему, значкі).

6. Тэрыторыяй Нацыянальнага парку з'яўляюцца землі, перададзеныя яму ў пастаяннае карыстанне, землі іншых землеўладальнікаў, землекарыстальнікаў, уласнікаў зямельных участкаў.

   Землі Нацыянальнага парку з'яўляюцца землямі прыродаахоўнага прызначэння, на якіх забараняецца дзейнасць, што супярэчыць іх мэтаваму прызначэнню.

   Землі іншых землеўладальнікаў, землекарыстальнікаў і ўласнікаў зямельных участкаў, а таксама будынкі і збудаванні юрыдычных і фізічных асоб, што знаходзяцца ў межах Нацыянальнага парку, выкарыстоўваюцца ў адпаведнасці з іх прызначэннем з абавязковым выкананнем гэтымі асобамі рэжыму гаспадарчай дзейнасці, устаноўленага дадзеным Палажэннем.

   Структура тэрыторыі Нацыянальнага парку і яе рэжым

7. На тэрыторыі Нацыянальнага парку з улікам яе прыродаахоўнай, аздараўленчай, навуковай, рэкрэацыйнай, гістарыка-культурнай і іншых каштоўнасцей устанаўліваюцца функцыянальныя зоны з адпаведным рэжымам:

   • запаведная зона, прызначаная для захавання і аднаўлення найбольш каштоўных прыродных комплексаў і аб’ектаў, стварэння ўмоў для іх натуральнага эвалюцыйнага развіцця і вывучэння. У дадзенай зоне забараняюцца ўсе віды дзейнасці, акрамя правядзення навуковых даследаванняў і мерапрыемстваў па яе ахове.

   Тэрмін функцыянавання запаведнай зоны не ўстанаўліваецца.

   Знаходжанне ў запаведнай зоне старонніх асоб без спецыяльнага дазволу Нацыянальнага парку забараняецца.

   Навуковыя і ахоўныя мерапрыемствы ў запаведнай зоне ажыццяўляюцца па планах і праектах, распрацаваных і зацверджаных ва ўстаноўленым парадку;

   • зона рэгуляванага выкарыстання, якая прызначана для вывучэння, захавання, аднаўлення парушаных прыродных комплексаў, узнаўлення і выкарыстання прыродных рэсурсаў шляхам прымянення перадавых метадаў ашчаднага прыродакарыстання.

     Тэрмін функцыянавання зоны рэгуляванага выкарыстання не ўстанаўліваецца на тэрыторыях, дзе размешчаны як натуральныя, так і парушаныя дзейнасцю чалавека прыродныя комплексы.

     У зоне рэгуляванага выкарыстання дазваляюцца:

     • правядзенне навуковых даследаванняў;

     • ажыццяўленне мерапрыемстваў па аднаўленні парушаных прыродных комплексаў і ўзнаўленні прыродных рэсурсаў;

     • ажыццяўленне супрацьпажарных мерапрыемстваў (стварэнне, мінералізацыя прасек і супрацьпажарных разрываў, стварэнне вадаёмаў і сістэм супрацьпажарнага прызначэння, уборка ветравала, бурэлому, сухастою);

     • будаўніцтва і рамонт дарог, звязаных з задачамі і мэтамі Нацыянальнага парку;

     • ахова (пераважна біялагічнымі метадамі) участкаў лесу ад шкоднікаў і хвароб;

     • правядзенне санітарных высечак, высечак догляду за лесам, высечак па фарміраванні карэнных фітацэнозаў, лесааднаўленчых мерапрыемстваў, накіраваных на павышэнне ўстойлівасці лесавых экалагічных сістэм у адпаведнасці з зацверджаным праектам арганізацыі і развіцця Нацыянальнага парку;

     • падкормка капытных у экстрэмальных умовах;

     • ажыццяўленне санітарна-ветэрынарных, лячэбна-прафілактычных і біятэхнічных мерапрыемстваў у мэтах захавання генафонду, а таксама папярэджання захворванняў дзікіх жывёл;

     • турызм і правядзенне экскурсій пад кіраўніцтвам экскурсаводаў і спецыялістаў Нацыянальнага парку.

     Могуць быць дазволены таксама і іншыя віды дзейнасці, якія не супярэчаць мэтаваму прызначэнню зоны рэгуляванага выкарыстання, у адпаведнасці з зацверджаным праектам арганізацыі і развіцця Нацыянальнага парку.

     На спецыяльна выдзеленых участках дазваляюцца сенакос, выпас жывёлы, збор грыбоў і ягад, аматарскае рыбалоўства, здабыча водных бесхрыбтовых і іншыя віды прыродакарыстання для патрэб Нацыянальнага парку і насельніцтва, якое пражывае на яго тэрыторыі;

   • рэкрэацыйная зона, прызначаная для размяшчэння аб'ектаў і збудаванняў санаторна-курортнага лячэння, турызму і адпачынку насельніцтва, а таксама для правядзення культурна-масавых і аздараўленчых мерапрыемстваў. У яе ўключаюцца ўчасткі Нацыянальнага парку, прыдатныя для размяшчэння аб'ектаў турызму і адпачынку, прызнаныя каштоўнымі ў культурна-гістарычных і рэкрэацыйных адносінах.

     Рэкрэацыйная зона выкарыстоўваецца па планах, праектах і праграмах рэкрэацыйнай дзейнасці.

     У рэкрэацыйнай зоне дазваляюцца турызм, аматарскае рыбалоўства ў устаноўленых месцах, арганізацыя стаянак, пляцовак для адпачынку, усталяванне намётаў і распальванне вогнішчаў у адведзеных для гэтага месцах, а таксама правядзенне неабходных супрацьпажарных і лесааднаўленчых мерапрыемстваў, санітарных высечак, высечак догляду за лесам (ландшафтныя высечкі) і іншых мерапрыемстваў у адпаведнасці з зацверджаным праектам арганізацыі і развіцця Нацыянальнага парку.

     У працэсе рэкрэацыйнай дзейнасці павінны выконвацца патрабаванні па недапушчэнні дэградацыі прыродных комплексаў Нацыянальнага парку і прымяняцца меры, накіраваныя на захаванне існуючых ландшафтаў, вод, расліннага і жывёльнага свету;

   • гаспадарчая зона, прызначаная для размяшчэння і эксплуатацыі будынкаў і збудаванняў адміністрацыйнага, вытворчага і камунальна-бытавога прызначэння, аб'ектаў для абслугоўвання наведвальнікаў Нацыянальнага парку і ажыццяўлення прамыслова-гаспадарчай, гандлёва-эканамічнай, турыстычнай, сельскагаспадарчай і іншай дзейнасці, якая не супярэчыць задачам і мэтам дадзенага парку. Гаспадарчую зону ўтвараюць участкі Нацыянальнага парку, якія не маюць навуковай, культурна-гістарычнай і рэкрэацыйнай каштоўнасці.

     У гаспадарчую зону ўключаюцца землі сельскагаспадарчага прызначэння, населеных пунктаў і іншыя землі, што ўваходзяць у склад Нацыянальнага парку.

8. Межы зон Нацыянальнага парку вызначаюцца праектам яго арганізацыі і развіцця, пазначаюцца на мясцовасці спецыяльнымі інфармацыйнымі і іншымі знакамі і могуць змяняцца ў выпадку абгрунтаванай неабходнасці на падставе рашэння навукова-тэхнічнага савета гэтага парку ў парадку, прадугледжаным часткай другой пункта 4 гэтага Палажэння. Змяненне межаў указаных зон за кошт памяншэння запаведнай зоны не дапускаецца.

9. На тэрыторыях, што прымыкаюць да Нацыянальнага парку, ствараецца ахоўная зона, якая прызначана для прадухілення негатыўнага ўздзеяння гаспадарчай і іншай дзейнасці на прыродныя комплексы і аб’екты Нацыянальнага парку.

   Межы ахоўнай зоны пазначаюцца на мясцовасці спецыяльнымі інфармацыйнымі і іншымі знакамі і ўлічваюцца ў планах землеўпарадкавання, іншых тэрытарыяльных планах і праектах.

   Землі ахоўнай зоны застаюцца ва ўладанні, карыстанні і ўласнасці ранейшых землеўладальнікаў, землекарыстальнікаў і ўласнікаў зямельных участкаў.

   У ахоўнай зоне забараняюцца:

   • правядзенне работ па акліматызацыі відаў дзікіх жывёл і раслін, чужых мясцовай флоры і фаўне;

   • выкананне работ, якія выклікаюць змяненне гідралагічнага рэжыму вадаёмаў, водатокаў і грунтовых вод альбо аказваюць уздзеянне на прыродныя комплексы Нацыянальнага парку;

   • скід у вадаёмы і водатокі неачышчаных сцёкавых вод і адходаў;

   • расчыстка воднай і прыбярэжнай расліннасці ў воднаахоўных зонах рэк і вадаёмаў, за выключэннем меліярацыйнай сеткі;

   • правядзенне выведак, праектаванне і будаўніцтва меліярацыйных сістэм і тарфяных прадпрыемстваў у пяцікіламетровай паласе ад межаў Нацыянальнага парку ў межах ахоўнай зоны;

   • іншыя віды гаспадарчай дзейнасці, якія могуць аказаць негатыўны ўплыў на прыродныя комплексы Нацыянальнага парку.

   Лясныя распрацоўкі, паляванне і промысловая лоўля рыбы ажыццяўляюцца ў ахоўнай зоне ў адпаведнасці з заканадаўствам Рэспублікі Беларусь.

   Землеўладальнікі, землекарыстальнікі і ўласнікі зямельных участкаў у межах ахоўнай зоны абавязаны выконваць устаноўлены рэжым аховы і выкарыстання гэтай зоны.

   Структура і органы кіравання Нацыянальнага парку

10. Структура, штатны расклад і каштарыс выдаткаў на ўтрыманне Нацыянальнага парку зацвярджаюцца Кіраваннем справамі Прэзідэнта Рэспублікі Беларусь у межах бюджэтных асігнаванняў, якія выдзяляюцца на ўтрыманне парку, а таксама сродкаў ад яго гаспадарчай дзейнасці.

    У вытворчую структуру Нацыянальнага парку ўваходзяць лясніцтвы, гаспадарчыя цэхі, іншыя вытворчыя ўчасткі. Пры неабходнасці Нацыянальны парк можа ствараць свае юрыдычныя асобы ў парадку, устаноўленым заканадаўствам Рэспублікі Беларусь, калі іх дзейнасць не супярэчыць задачам і мэтам Нацыянальнага парку.

    У мэтах комплекснага развіцця лясной і паляўнічай гаспадаркі, вырашэння прыродаахоўных і сацыяльна-эканамічных задач у структуру Нацыянальнага парку ўваходзіць эксперыментальная лясапаляўнічая гаспадарка "Мядзел", якая з'яўляецца навукова-вытворчай базай Нацыянальнага парку і дзейнічае на падставе Палажэння аб эксперыментальнай лясапаляўнічай гаспадарцы, зацверджанага Кіраваннем справамі Прэзідэнта Рэспублікі Беларусь.

11. Кіраванне Нацыянальным паркам ажыццяўляецца дырэктарам.

    Дырэктар Нацыянальнага парку, яго намеснікі, галоўны бухгалтар прызначаюцца на пасады і вызваляюцца ад пасад Кіраваннем справамі Прэзідэнта Рэспублікі Беларусь.

    Галоўны ляснічы і галоўны інжынер Нацыянальнага парку, дырэктар эксперыментальнай лясапаляўнічай гаспадаркі "Мядзел" прызначаюцца на пасады і вызваляюцца ад пасад дырэктарам Нацыянальнага парку па ўзгадненні з Кіраваннем справамі Прэзідэнта Рэспублікі Беларусь.

    Іншыя работнікі прымаюцца на працу і звальняюцца з працы ў адпаведнасці з заканадаўствам Рэспублікі Беларусь.

12. Дырэктар Нацыянальнага парку:

    • ажыццяўляе кіраванне Нацыянальным паркам на прынцыпах адзінаначалля, зыходзячы з ускладзеных на яго задач;

    • дзейнічае без даверанасці ад імя Нацыянальнага парку, у ўстаноўленым парадку распараджаецца яго сродкамі і маёмасцю;

    • адкрывае рахункі ў банкаўскіх установах, заключае дамовы;

    • выдае загады і распараджэнні, абавязковыя для выканання ўсімі работнікамі Нацыянальнага парку;

    • у адпаведнасці з заканадаўствам Рэспублікі Беларусь прымае на працу і звальняе з працы работнікаў Нацыянальнага парку, прызначае на пасады і вызваляе ад пасад кіраўнікоў яго структурных падраздзяленняў, прымяняе да работнікаў парку меры заахвочвання і спагнання;

    • арганізуе працу Нацыянальнага парку і нясе адказнасць за яго дзейнасць, ахову прыродных комплексаў і маёмасці, выкананне каштарысна-фінансавай, дагаворнай і працоўнай дысцыпліны, гаспадарчае вядзенне спраў і тэхніку бяспекі;

    • устанаўлівае работнікам Нацыянальнага парку надбаўкі да службовых акладаў;

    • забяспечвае павышэнне кваліфікацыі работнікаў гэтага парку;

    • ажыццяўляе кантроль за выкананнем планаў навукова-даследчых работ, заказаў і работ па дамовах;

    • кіруе дзейнасцю навукова-тэхнічнага савета Нацыянальнага парку, зацвярджае гадавыя тэматычныя планы, планы выдання і публікацыі навуковых прац спецыялістаў гэтага парку;

    • у парадку, устаноўленым заканадаўствам, нясе адказнасць за правільнасць і дакладнасць дзяржаўнай справаздачнасці.

13. Працоўныя адносіны паміж работнікамі Нацыянальнага парку рэгламентуюцца заканадаўствам, а таксама правіламі ўнутранага працоўнага распарадку і службовымі інструкцыямі, зацверджанымі дырэктарам гэтага парку.

    Правы і кампетэнцыя Нацыянальнага парку

14. У адпаведнасці з асноўнымі задачамі Нацыянальны парк распрацоўвае праекты, праграмы, перспектыўныя і гадавыя планы па асноўных напрамках дзейнасці і забяспечвае іх выкананне.

15. Нацыянальны парк у межах сваёй кампетэнцыі:

    • у адпаведнасці з заканадаўствам нясе адказнасць за парушэнне дагаворных, крэдытных, разліковых, падатковых і іншых абавязацельстваў;

    • ажыццяўляе аператыўны і бухгалтарскі ўлік вынікаў дагаворнай дзейнасці, вядзе статыстычную і бухгалтарскую справаздачнасць.

16. Нацыянальны парк ва ўстаноўленыя тэрміны падае ў Кіраванне справамі Прэзідэнта Рэспублікі Беларусь па адпаведных формах перыядычныя і гадавыя бухгалтарскія справаздачы і балансы, тлумачальныя запіскі, даклады, статыстычную справаздачнасць, а таксама іншую інфармацыю аб сваёй дзейнасці.

17. Нацыянальны парк мае права:

    • рэгуляваць наведванне яго тэрыторыі ў адпаведнасці з устаноўленым рэжымам;

    • запытваць у арганізацый, размешчаных на тэрыторыі парку, і атрымліваць ад іх неабходную інфармацыю аб выкарыстанні і ахове прыродных рэсурсаў, вядзенні сельскай, лясной, паляўнічай гаспадаркі і па іншых пытаннях, якія тычацца яго дзейнасці;

    • патрабаваць ад арганізацый, размешчаных на яго тэрыторыі, выканання прыродаахоўнага заканадаўства, устаноўленага рэжыму,

    • прыпыняць альбо спыняць работы на ўчастках і аб’ектах, на якіх дапушчаны парушэнні, да іх ліквідацыі;

    • накіроўваць матэрыялы аб парушэннях прыродаахоўнага заканадаўства і рэжыму, вызначанага гэтым Палажэннем, у суды, праваахоўныя і прыродаахоўныя органы для прыцягнення вінаватых да адказнасці;

    • ажыццяўляць у ўстаноўленым парадку гандлёва-закупачную дзейнасць, калі гэта не супярэчыць яго задачам і мэтам;

    • ўзаемадзейнічаць з нацыянальнымі паркамі, іншымі прыродаахоўнымі ўстановамі, дзяржаўнымі і грамадскімі арганізацыямі як у Рэспубліцы Беларусь, так і за мяжой.

18. Валоданне, карыстанне і распараджэнне замацаванай маёмасцю ажыццяўляецца Нацыянальным паркам у межах, вызначаных заканадаўствам, і ў адпаведнасці з мэтамі яго дзейнасці, заданнямі Кіравання справамі Прэзідэнта Рэспублікі Беларусь і прызначэннем маёмасці.

19. Маёмасць Нацыянальнага парку фарміруецца з асноўных фондаў і іншых матэрыяльных каштоўнасцяў.

20. Дзейнасць Нацыянальнага парку фінансуецца за кошт:

    • сродкаў з дзяржаўнага бюджэту;

    • сродкаў, атрыманых ад гаспадарчай, рэкрэацыйнай, навуковай, асветніцкай, рэкламна-выдавецкай і іншай дзейнасці, якая не супярэчыць задачам і мэтам Нацыянальнага парку;

    • крэдытаў банкаў;
    
    
    • дабрачынных узносаў, безвыплатнай дапамогі;

    • іншых крыніц, не забароненых заканадаўствам Рэспублікі Беларусь.

21. Прыбытак, атрыманы ў выніку гаспадарчай і іншай дзейнасці, пасля выплаты падаткаў і іншых абавязковых плацяжоў застаецца ў распараджэнні Нацыянальнага парку і выкарыстоўваецца для папаўнення асноўных фондаў, фінансавання навуковых даследаванняў і распрацовак, іншых напрамкаў дзейнасці парку ў адпаведнасці з яго задачамі і мэтамі, а таксама для ўстанаўлення надбавак і даплат да службовых акладаў работнікаў парку, забеспячэння ім іншых выплат згодна з заканадаўствам.

22. З Нацыянальным паркам узгадняюцца пытанні сацыяльна-культурнай і гаспадарчай дзейнасці суб'ектаў гаспадарання, а таксама праекты развіцця населеных пунктаў, якія знаходзяцца на яго тэрыторыі.

    Ахова Нацыянальнага парку.
    Правы і сацыяльная абарона работнікаў аховы Нацыянальнага парку

23. Ахова Нацыянальнага парку, яго прыродных комплексаў і аб'ектаў, кантроль за выкананнем устаноўленага рэжыму ў ахоўнай зоне забяспечваюцца работнікамі аховы гэтага парку ў адпаведнасці з пералікам пасад работнікаў, якія ўваходзяць у склад аховы запаведнікаў і нацыянальных паркаў сістэмы Кіравання справамі Прэзідэнта Рэспублікі Беларусь.

24. Работнікі аховы Нацыянальнага парку карыстаюцца ўсімі правамі і льготамі, прадастаўленымі работнікам дзяржаўнай лясной і рыбнай аховы.

25. Работнікам аховы Нацыянальнага парку выдаецца бясплатнае абмундзіраванне ўстаноўленага ўзору. Яны маюць права на захоўванне і нашэнне агнястрэльнай зброі пры выкананні службовых абавязкаў у адпаведнасці з табелем узбраення, зацверджаным ва ўстаноўленым парадку. Парадак набыцця, захоўвання і прымянення зброі вызначаецца заканадаўствам Рэспублікі Беларусь.

26. Работнікі аховы Нацыянальнага парку маюць права:

    • правяраць у асоб, якія знаходзяцца на тэрыторыі парку, наяўнасць адпаведнага дазволу, а таксама дакументаў на права прыродакарыстання і ажыццяўлення іншай дзейнасці, праводзіць агляд транспартных сродкаў;

    • складаць пратаколы аб парушэннях лесагаспадарчага і прыродаахоўнага заканадаўства, прымяняць да парушальнікаў меры спынення ў адпаведнасці з заканадаўствам;

    • дастаўляць у праваахоўныя органы асоб, якія парушылі прыродаахоўнае заканадаўства і рэжым аховы гэтага парку;

    • канфіскоўваць у парушальнікаў прыродаахоўнага заканадаўства прадукцыю і прылады незаконнага прыродакарыстання.

27. Дырэктару Нацыянальнага парку, яго намесніку па ахове жывёльнага свету і паляўнічай гаспадарцы, галоўнаму ляснічаму прадастаўлена права:

    • накладаць адміністрацыйныя спагнанні і штрафы за парушэнне заканадаўства аб асабліва ахоўных прыродных тэрыторыях і аб'ектах і сапраўднага Палажэння;

    • у выпадках, прадугледжаных заканадаўствам, накіроўваць матэрыялы аб парушэннях у праваахоўныя органы.

    Адказнасць за парушэнне заканадаўства аб Нацыянальным парку

28. Юрыдычныя і фізічныя асобы, вінаватыя ў парушэнні патрабаванняў заканадаўства ў галіне аховы навакольнага асяроддзя, а таксама сапраўднага Палажэння, нясуць адміністрацыйную, крымінальную або іншую адказнасць згодна з заканадаўствам.

    Навукова-даследчая і асветніцкая дзейнасць

29. Арганізацыя і правядзенне навуковых даследаванняў, маніторынг, навуковае забеспячэнне практычных задач Нацыянальнага парку ажыццяўляюцца яго навуковым аддзелам пад навукова-метадычным кіраўніцтвам Нацыянальнай акадэміі навук Беларусі.

30. Навуковым аддзелам распрацоўваюцца перспектыўныя і гадавыя планы, праграмы, праекты і мерапрыемствы навукова-даследчых работ па праблемах аховы прыроды, рэгуляванага прыродакарыстання, рэкрэацыйнага, гаспадарчага выкарыстання тэрыторыі Нацыянальнага парку, якія разглядаюцца на пасяджэннях навукова-тэхнічнага савета і зацвярджаюцца дырэктарам Нацыянальнага парку.

31. Навукова-тэхнічны савет ствараецца для абмеркавання асноўных пытанняў навукова-даследчай дзейнасці Нацыянальнага парку, абгрунтавання прыродаахоўных мерапрыемстваў і рэгуляванага прыродакарыстання. Узглавляе навукова-тэхнічны савет дырэктар Нацыянальнага парку.

32. Навукова-тэхнічны савет у сваёй працы кіруецца заканадаўствам Рэспублікі Беларусь, сапраўдным Палажэннем і Палажэннем аб навукова-тэхнічным савеце Нацыянальнага парку, зацверджаным Кіраваннем справамі Прэзідэнта Рэспублікі Беларусь.

    У склад навукова-тэхнічнага савета ўваходзяць дырэктар Нацыянальнага парку, яго намеснік па навукова-даследчай працы, вучоны сакратар, галоўны ляснічы, навуковыя супрацоўнікі і спецыялісты Нацыянальнага парку, вучоныя Нацыянальнай акадэміі навук Беларусі, прадстаўнікі іншых зацікаўленых арганізацый, вядучыя спецыялісты ў галіне аховы навакольнага асяроддзя, лесагаспадаркі.

    Для выканання навуковых даследаванняў і аказання навукова-метадычнай дапамогі ў Нацыянальны парк на дагаворных умовах могуць запрашацца спецыялісты з іншых устаноў або арганізацый, а таксама па ўзгадненні з вышэйстаячай арганізацыяй спецыялісты замежных краін.

33. Нацыянальнаму парку прадастаўляецца права выдання навуковых прац, навуковых і папулярных работ, літаратуры аб запаведнай справе, рэкламных і даведачных матэрыялаў.

    Для арганізацыі выдання навуковых прац, папулярнай літаратуры, рэкламных і даведачных матэрыялаў у Нацыянальным парку можа стварацца рэдакцыйна-выдавецкі савет на чале з намеснікам дырэктара па навукова-даследчай працы.

    Міжнароднае супрацоўніцтва Нацыянальнага парку

34. Нацыянальны парк супрацоўнічае з дзяржаўнымі органамі, грамадскімі аб'яднаннямі, грамадзянамі Рэспублікі Беларусь і замежных дзяржаў па пытаннях навуковых даследаванняў, запаведнай справы, прыродакарыстання, гаспадарчай дзейнасці і маніторынгу.

    Дзяржаўны і грамадскі кантроль за выкарыстаннем і аховай Нацыянальнага парку

35. Дзяржаўны і грамадскі кантроль за выкарыстаннем і аховай Нацыянальнага парку ажыццяўляецца ў адпаведнасці з заканадаўствам Рэспублікі Беларусь.

    Спыненне дзейнасці Нацыянальнага парку

36. Рашэнне аб спыненні дзейнасці (рэарганізацыі або ліквідацыі) Нацыянальнага парку прымаецца Прэзідэнтам Рэспублікі Беларусь.