Занарач

Занарач - аграгарадок, размешчаны на паўднёвым беразе возера Нарач ў Мядзельскім раёне Мінскай вобласці ў межах Нацыянальнага парка Нарачанскі. Праз населены пункт праходзіць аўтамабільная шаша Р60, якая вядзе да курортнага пасёлку Нарач. Адлегласць да г. Мядзела складае 25 км, да г. Мінска - 140 км.

Першыя згадкі аб паселішчы ставяцца да другой паловы XV ст.: Занарач належала Віленскаму ваеводзe Алехно Судзімантовічу і знаходзілася ў складзе Вялікага княства Літоўскага, а пасля стварэння Речы Поспалітай - увайшла ў склад Ашмянскага павета Віленскага ваяводства. У 1795 годзе ў выніку трэцяга падзелу Рэчы Паспалітай тэрыторыя была далучана да Расійскай імперыі.
У Першай сусветнай вайне ў час правядзення наступальнай аперацыі ўсё паселішча аказалася акупаваным германскімі войскамі. Тут праходзіла лінія фронту, зараз у а.г. Занарач сустракаюцца абарончыя збудаванні, якія сведчаць пра падзеі тых часоў.
Другая сусветная вайна таксама пакінула крывавы след у гісторыі вёскі. Нямецка-фашысцкімі захопнікамі быў расстраляны 41 жыхар, сяло было цалкам спалена, за выключэннем аднаго каменнага дома.
Пасля вайны вёска была адбудавана нанова. У 2005 годзе ёй быў прысвоен статус аграгарадка.

Да выдатных мясцінаў аграгарадка Занарач можна аднесці Свята-Праабражэнскую царкву, пабудаваную ў 1990-х гадах (на месцы знішчанай падчас вайны царквы), стэлу ў памяць аб загінуўшых у Вялікую Айчынную вайну, узведзеную ў 1965 г., абарончыя збудаванні часоў першай сусветнай вайны і ветраныя электрагенератары.

Недалёка ад населенага пункта размешчаны санаторый «Журавушка» (у 6 км), аздараўленчы комплекс «Чайка» (у 10 км) і турыстычны комплекс «Наносы» (у 11 км).