Альбуць

Альбуць - хутар ў Стаўбцоўскім раёне Мінскай вобласці, які знаходзіцца ў 5 км ад г. Стоўбцы ў асяроддзі лесу.

У лясніцтве Альбуць ў перыяд 1890 па 1904 гг. жыла сям'я Міцкевічаў. Тут прайшлі дзіцячыя і юнацкія гады Якуба Коласа, тут ён напісаў свой першы верш. Сядзіба ў Альбуці стала чацвёртым месцам службы для бацькі будучага пісьменніка. Менавіта адсюль Якуб Колас паехаў на вучобу ў Нясвіжскую настаўніцкую семінарыю, сюды вяртаўся кожнае лета ўжо маладым настаўнікам. Праз гады вядомы беларускі пісьменнік увекавечыў Альбуць у сваёй паэме «Новая зямля» як Парэчча.

У цяперашні час у в. Альбуць створана мемарыяльная сядзіба Якуба Коласа «Альбуць». Экспазіцыя складаецца з фатаграфій прататыпаў герояў паэмы, рукапісаў, выданняў паэмы розных гадоў, прадметаў побыту сялян XIX-XX стст.