Ганцавіцкі раённы краязнаўчы музей

Ганцавіцкі раённы краязнаўчы музей створаны 1 студзеня 1997 г. Адкрыты для наведвальнікаў 20.10.2002 года да 120-годдзя з дня нараджэння класіка беларускай літаратуры Якуба Коласа. Музей з'яўляецца адной з славутасцяў горада Ганцавічы, ён займае драўляны асабняк па вуліцы Заслонава. У музеі адна выставачная і чатыры экспазіцыйныя залы агульнай дэманстрацыйнай плошчай 146 м², дзейнічае 18 пастаянных экспазіцый. Сёння фонды музея - гэта багаты збор прадметаў, якія маюць вялікае культурнае і гістарычнае значэнне для гэтага Палескага краю. Па стане на 1 студзеня 2013 г. у фондах музея налічвалася 5648 прадметаў (2747 - асноўнага фонду, 2901 - навукова-дапаможнага). Храналагічныя рамкі музейных прадметаў ад III тысячагоддзя да н.э. (Каменны век) да сённяшніх дзён. Штогод фонды павялічваюцца на 250-300 адзінак. Вялікую дапамогу ў папаўненні калекцый аказваюць мясцовыя жыхары. Фонды музея складаюцца з сямі калекцый. Якасцю і паўнатой вылучаюцца этнаграфічная, нумізматычная і калекцыя фотадакументаў.

У выставачнай зале праходзяць тэматычныя выставы. Супрацоўнікамі музея распрацавана некалькі праектаў, па рэалізацыі якіх вядзецца актыўная праца: «Прыродная спадчына Ганцаўшчыны», «У пошуках страчанага», «Выратаваныя каштоўнасці», «Ганцавічы: учора і сёння», «Ганцаўшчына 1941-1944» і «Хрысціянскія святыні Ганцаўшчыны» . У рамках гэтых праектаў праходзяць майстар-класы, музейна-педагагічныя гадзіны, аглядныя выязныя экскурсіі па месцах воінскіх пахаванняў, урокі мужнасці. Арганізавана супрацоўніцтва з Генеральным Консульствам Рэспублікі Польшча ў г. Брэсце. Наладжаны сувязі з дыпламатычнымі прадстаўніцтвамі Кітайскай Народнай рэспублікі, Японіі, Ісламскай Рэспублікі Іран. Сведчанне гэтаму - выставы «Акно ў Паднябесную", "Традыцыі і культура Японіі», «Іранскія ручныя промыслы».

Музей узнагароджаны «Дыпломам за 3 месца ў намінацыі «Культура і мастацтва »на выставе Tibo-2011» за афіцыйны сайт Ганцавіцкага раённага краязнаўчага музея, Дыпломам за ўдзел у Першым нацыянальным форуме «Музеі Беларусі» 2012, Дыпломам у намінацыі «Лепшы музей» па выніках працы за 2005 год ад Упраўлення культуры Брэсцкага аблвыканкама, 2006; Дыпломам 2 ступені ў рэспубліканскім конкурсе-аглядзе на лепшы музей года па патрыятычным выхаванні моладзі ў намінацыі «Музей і новыя адукацыйныя праграмы па патрыятычнаму выхаванню моладзі» 2009.

З культурна-масавых мерапрыемстваў 1-2 разы ў месяц праводзіцца лекцыя «Ганцавічы: учора і сёння», якая расказвае пра асноўныя вехі развіцця мястэчка, гарадскога пасёлка, горада Ганцавічы. У населеных пунктах Ганцавіцкага раёна 10 раз у год праходзяць музейна-педагагічныя заняткі "Гісторыка-культурная спадчына Ганцаўшчыны» - наведванне былой сядзібы роду Свежинских, курганных могільнікаў, былой сядзібы роду Абуховічаў, святога месца - Ізбійскі Бор. На азёрах Ганцавіцкага раёна 10 раз у год праводзяцца музейна-педагагічныя заняткі "Азёры Ганцаўшчыны» - наведванне азёр раёна: Шчыльнае, Горнае, Дубоўскі, Чырвонае. Музейна-педагагічныя заняткі "Прыродная спадчына Ганцаўшчыны» прапануе экскурсію па навукова-эксперыментальнай базе АН «Журавінка», гідралагічным заказніку «Падвялікі мох». 1 раз у год у краязнаўчым музеі праходзіць мерапрыемства "Музейная ноч" і сустрэчы з цікавымі людзьмі (мастакамі, паэтамі, пісьменнікамі і інш.).

Навукова-даследчая праца, якая праводзіцца ў музеі, накіравана на ўсебаковае вывучэнне свайго раёна супрацоўнікамі. За апошнія некалькі гадоў былі вывучаны наступныя тэмы: "Гісторыя пажарнай службы», «Гісторыя раённага аддзела міліцыі», «Літаратурная Ганцаўшчына», «Гісторыя стварэння і фарміравання горада Ганцавічы", "Гісторыя развіцця чыгунак на Ганцаўшчыне», «Хрысціянскія святыні Ганцаўшчыны» , «Прыродная спадчына Ганцаўшчыны» і інш.